Таъсиси фабрикаи ресандагӣ дар Фархор

Фархор, 11 сентябр. (АМИТ «Ховар», С. Холов).-Масъулини ҶДММ «Адолат-А»-и ноҳияи Фархор тасмим гирифтаанд, ки дар дохили корхона фабрикаи ресандагии бо таҷҳизоти навтарини олмонӣ муҷаҳҳазро ба маблағи 7 миллион доллари амрикоӣ таъсис дода, беш аз 300 нафар бекоронро ба ҷои кори доимӣ таъмин намоянд. Ба иттилои директори корхона Сайвалӣ Неъматов масоҳати ҷойгиршавии фабрика 4,5 гектарро дар бар гирифта, иқтидори коркард вобаста ба воридшавии ашёи хом дар назар дошта шудааст. Сохтмони бино аз моҳи ноябри соли ҷорӣ оғоз гардида, он дар нимаи дуюми соли 2014-ум ба истифода дода мешавад. То ин муддат ба корхона 1200 тонна пахта ворид гардида, аз ин шумора беш аз 300 тоннаи он коркард шудааст. Мавриди зикр аст, ки корхона бо 750 хоҷагии деҳқонӣ шартнома дошта, бо нархи 650 долларӣ ашёи хомро аз хоҷагиҳо мехарад. Корхона дар ду баст фаъолият дошта, дар он 100 нафар коргар ба коркарди пахта сафарбар гардидаву музди миёнаи маоши онҳо аз 600 то 1000 сомониро ташкил медиҳад.