Тоҷикистон — шарики фаъоли Чин

Душанбе, 4 сентябр. (АМИТ «Ховар», Кристина Эрлих). – Бо даъвати кумитаи тадорукотии ЭКСПО «Чин – АвруОсиё — 2013» ҳайати расмии Тоҷикистон бо роҳбарии муовини аввали Сарвазири Ҷумҳурии Тоҷикистон Матлубхон Давлатов дар маросими ботантана ба муносибати ифтитоҳи Намоишгоҳ – ярмаркаи 3 — уми байналмилалии ЭКСПО «Чин – АвруОсиё – 2013» дар шаҳри Урумчи иштирок намуд. Ба ҳайати Тоҷикистон Вазири рушди иқтисод ва савдои Ҷумҳурии Тоҷикистон Шариф Раҳимзода ва Сафири Тоҷикистон дар Ҷумҳурии Мардумии Чин Рашид Олимов шомиланд. Матлубхон Давлатов аз номи Ҳукумати Ҷумҳурии Тоҷикистон ба раиси Ҳукумати мардумии Ноҳияи мухтори Синҷону Уйғури Ҷумҳурии Мардумии Чин барои даъват ба кори намоишгоҳи 3 – юми ЭКСПО «Чин – АвруОсиё», ҳамчунин ба директори Кумитаи иҷроияи ЭКСПО «Чин – АвруОсиё – 2013» Ши Даган барои ташкили гуворои ин чорабинии муҳим изҳори миннатдорӣ кард. Нигораҳои Тоҷикистон иборат аз маҳсулоти корхонаю муассисаҳои ҷумҳурӣ, ширкатҳои Тоҷикистону Чин ва ғайра мебошанд. Қобили зикр аст, ки аз рӯи натиҷаҳои ярмаркаҳои якум ва дуюми ЭКСПО «Чин – АвруОсиё – 2013», ки мутаносибан солҳои 2011 ва 2012 дар шаҳри Урумчи баргузор гардида буданд, созишномаҳои тиҷоратию иқтисодӣ ба маблағи 12 миллиард доллари ИМА имзо шуда буданд.