Қобилияти кории 1068 нафар маъюб барқаррор гардид

Душанбе, 29 октябр. (АМИТ «Ховар», Л. Қосимова). — Бо мақсади таъмини шаффофият ва аз байн бурдани ҳолатҳои беасос муқаррар намудани гуруҳи маъюбӣ, пешгириву бартараф намудани камбудиҳои ҷойдошта дар фаъолияти шуъбаҳои Хадамоти давлатии ташхиси тиббию иҷтимоӣ дар шаҳри Душанбе, вилоятҳои Хатлон ва Суғд, ноҳияҳои тобеи ҷумҳурӣ, минтақаи Рашт (ноҳияҳои Нуробод, Рашт, Тоҷикобод, Тавилдара ва Ҷиргатол) санҷишҳо гузаронида шуданд. Дар ин давра барои гузаштан аз ташхиси тиббӣ — 24059 нафар шаҳрванд муроҷиат намуд, ки дар муқоиса нисбат ба нуҳ моҳи соли 2012-ум 3401 нафар коҳиш ёфта, ба 22 538 нафар гуруҳи маъюбӣ муқаррар карда шудааст. Аз теъдоди умумии муроҷиаткунандагон 7282 нафар бори аввал муроҷиат намудаанд, ки ба 6732 нафари онҳо гуруҳи маъюбӣ муқаррар гардид. Аз сабаби надоштани аломатҳои маъюбӣ ба 550 нафар муроҷиаткунандагон гуруҳи маъюбӣ муқаррар карда нашуд, ки ин аз баландшавии сифати ташхиси тиббию иҷтимоӣ шаҳодат медиҳад.