Ҳуқуқи муаллиф ҳимоя мешавад

Душанбе, 23 октябр. (АМИТ «Ховар», Раъно Нусратуллоева).- Семинар дар мавзӯи «Ҳифзи ҳуқуқи муаллиф ва иҷрои муқаррароти «Созишномаи савдо оид ба ҷанбаҳои ҳуқуқии моликияти зеҳнӣ дар партави воридшавии Тоҷикистон ба Созмони умумиҷаҳонии савдо» 25 октябри соли равон дар Вазорати фарҳанги Ҷумҳурии Тоҷикистон баргузор мегардад.Дар семинар аз ҷониби намояндагони Вазорати фарҳанг, Вазорати корҳои дохилӣ, Вазорати адлия, Шӯрои адлия, Хадамоти гумрук, Кумитаи телевизион ва радио, Вазорати рушди иқтисод ва савдо ва намояндагони соҳа дар вилоятҳои ҷумҳурӣ баррасии маърӯзаҳо дар мавзуъҳои «Қонунгузории Ҷумҳурии Тоҷикистон вобаста ба соҳаи ҳуқуки муаллиф ва иҷрои талаботи Созишнома оид ба ҷанбаҳои ҳуқуқии моликияти зеҳнӣ (ТРИПС)», «Нақши мақомоти ҳифзи ҳуқуқ дар пешгирии ғайриқонунӣ паҳн намудани объектҳои моликияти зеҳнӣ», «Тарзу тартиби муроҷиати шаҳрвандон ҳангоми вайрон шудани ҳуқуқҳои муаллифии онҳо», «Ҳамкории мақомоти дахлдор дар масъалаи пешгирии ғайриқонунӣ ворид ва содир шудани объектҳои моликияти зеҳнӣ дар сарҳад», «Пардохти ҳаққи қалами муаллифон аз ҷониби истифодабарандагони асарҳо ва роҳҳои беҳбуд бахшидани кор дар ин самт» ва дигар масъалаҳо дар назар аст.