Бахши хусусии Тоҷикистон ба СУС муаррифӣ мешавад

Душанбе, 17 октябр. (АМИТ «Ховар»,  Фарзона  Достонзода). –  Палатаи  савдо  ва  саноати  Тоҷикистон дар  ҳошияи  татбиқи  лоиҳаи   аз масоили  Созмони умумиҷаҳонии  савдо  бештар  воқиф  гардидани аҳли  тиҷорат якҷоя бо  Маркази  байналмилалии  савдо дар   шаҳрҳои  Душанбе,  Қӯрғонтеппа  ва  Хуҷанд барои  бахши  хусусӣ   якчанд  семинар  доир менамояд. 
 
Дар  ҷараёни  семинарҳо масоили  марбут ба мақоми  Созмони  умумиҷаҳонии  савдо  дар   раванди   савдои  ҷаҳонӣ ва  принсипҳои  асосии  Созмони умумиҷаҳонии  савдо  инъикос  дода  мешаванд. Ҳамчунин  раванди  ворид  шудани  Ҷумҳурии  Тоҷикистон  ба  Созмони  умумиҷаҳонии  савдо  ва  ӯҳдадориҳои  Тоҷикистон  аз  рӯи   дастрасӣ  ба  бозори  амволу   хидматрасонӣ ва  ҳалли    баҳсу  мунозираҳои тиҷоратии  байналмилалӣ ҷамъбаст   карда  мешавад. 
 
Тавре  ки  аз  Маркази  савдои  байналмилалӣ хабар  доданд,  семинарҳоро   коршиносону  мутахассисоне  доир  менамоянд, ки  дар  раванди воридшавии  Тоҷикистон  ба  Созмони  умумиҷаҳонии  савдо  мустақиман   ширкат  доштанд.