Дидори Владимир Каланда аз АНМН ҶТ

Душанбе, 8 октябр. (АМИТ «Ховар», Лутфия Эшонқулова). – 7 октябр дар ҷараёни мулоқоти Директори Агентии назорати маводи нашъаовари назди Президенти ҶТ Рустам Назаров бо муовини аввали Директори Хадамоти федералии назорати гардиши маводи нашъаовари Федератсияи Русия Владимир Каланда масъалаи фаъолияти муштараки мақомоти ҳифзи ҳуқуқ ва сохторҳои қудратии кишвар, ки бо гардиши ғайриқонунии маводи нашъаовар мубориза мебаранд, ҳамчунин мавзӯи сиёсати Ҳукумати Тоҷикистон дар бахши мубориза бо маводи нашъаовар ва ҳамкорӣ бо муассисаҳои зидди маводи нашъаовари кишварҳои дигар мавриди муҳокима қарор гирифтанд. Назар ба хабари маркази матбуоти Агентии назорати маводи нашъаовар, ҷонибҳо ҳамчунин ҷараёни татбиқи Созишномаи байни Агентии назорати маводи нашъаовари ҶТ ва Хадамоти федералии Федератсияи Русия оид ба назорати гардиши маводи нашъаовар «Дар бораи расонидани кӯмак ба Агентӣ ҷиҳати мубориза бо гардиши ғайриқонунии маводи нашъаовар, моддаҳои фалаҷкунандаи асаб ва ашёи хоми онҳо» аз 5 октябри соли 2012 – ро баррасӣ намуданд.Тавре ки Директори Агентии назорати маводи нашъаовар зикр намуд, Тоҷикистон барои ҷилавгирии ба қаламраваш воридшавии маводи нашъаовар чораҳои ҷиддӣ дида ва бо ин васила интиқоли маводи нашъаовар ба Русия ва Аврупоро маҳдуд месозад. Рустам Назаров ба ҳайати Хадамоти федералии назорати маводи нашъаоварии Федератсияи Русия хабар дод, ки Агентӣ моҳи ноябри соли равон мулоқоти вазирон — роҳбарони муассисаҳои мубориза бо маводи нашъаовари Афғонистон, кишварҳои Осиёи Марказӣ, Эрон, Покистон, ҶМЧ, ИМА, Туркия, Русия ҳамчунин Иттиҳоди Аврупоро аз рӯи масоили мубориза бо маводи нашъаовар ташкил карданист.