Э. Раҳмон ба мансаби Президентӣ ба қайд гирифта шуд

     Душанбе, 9 октябр. (АМИТ «Ховар», Бекназари Абӯбакр). — Имрӯз ҷаласаи Комиссияи марказии интихобот ва раъйпурсии Ҷумҳурии Тоҷикистон баргузор гардид, ки дар он масъалаи ба қайд гирифтани номзад ба мансаби Президенти Ҷумҳурии Тоҷикистон мавриди баррасӣ қарор дода шуд.
        Зикр гардид, ки ба Комиссияи марказии интихобот ва раъйпурсӣ қарорҳои Анҷумани Иттифоқи ҷавонони Тоҷикистон, Федератсияи иттифоқҳои касабаи мустақили Тоҷикистон ва Ҳизби Халқии Демократии Тоҷикистон оид ба пешбарии номзадии Эмомалӣ Раҳмон ба мансаби Президенти Ҷумҳурии Тоҷикистон ирсол гардида буд.
 7 октябри соли 2013  ҳуҷҷатҳо ва маводи зарурӣ, аз ҷумла бланкаҳо бо имзоҳои интихобкунандагон оид ба дастгирии номзади пешбаригардида ба Комиссияи марказии интихобот ва раъйпурсӣ пешниҳод шуданд.
      Маводҳои пешниҳодгардида аз ҷониби масъулони Комиссияи марказии интихобот ва раъйпурсӣ мавриди омӯзиш қарор дода шуд. Дар натиҷа маълум гардид, ки ҳуҷҷатҳо ва маводҳои пешниҳодшуда ба талаботи моддаи 25 Қонуни конститутсионии Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон» мувофиқ мебошанд.
Бо назардошти ин, бо Қарори Комиссияи марказии интихобот ва раъйпурсӣ аз 9 октябри соли 2013  Эмомалӣ Раҳмон ҳамчун номзад ба мансаби Президенти Ҷумҳурии Тоҷикистон ба қайд гирифта шуд.
Ҳамзамон 15 нафар шахсони боэътимод, ки  барои бақайдгирӣ ба Комиссияи марказии интихобот ва раъйпурсӣ пешниҳод гардида буданд, ба сифати шахсони боэътимод барои гузаронидани маъракаи интихоботии номзад, ташвиқот бурдан ва ҳимояи манфиатҳои номзад ба мансаби Президенти Ҷумҳурии Тоҷикистон, ба қайд гирифта шуданд.