Форуми зиёиёни эҷодӣ ва илмии ИДМ

Душанбе, 2 октябр. (АМИТ «Ховар», Раъно Нусратуллоева).- Чанде пеш дар пойтахти Ҷумҳурии Беларус- шаҳри Минск форуми VIII зиёиёни эҷодӣ ва илмии давлатҳои аъзои Иттиҳоди Давлатҳои Мустақил баргузор гардид. Тавре ки аз Консерваторияи миллии Тоҷикистон ба номи Т. Сатторов ба АМИТ «Ховар» иттилоъ доданд, дар чаҳорчӯбаи ин форум Шӯрои ҳамоҳангсозии ректорони консерваторияҳо ва академияҳои мусиқии ИДМ баргузор гардид, ки дар он масъалаҳои инкишофи ҳамкории дурнамои муассисаҳои олии ин кишварҳо – шарикон дар соли 2014 муҳокима гардид. Ҳамзамон масъалаи бунёди оркестри симфонии ҷавонони ИДМ ҳалли худро ёфт. Дар анҷоми ҷаласаи Шӯрои ректорон ва Академияи мусиқӣ қарордодҳои ҳамкорӣ миёни Консерваторияи миллии Тоҷикистон ба номи Т. Сатторов ва Академияи давлати мусиқии Беларус ба имзо расонида шуд. Ба имзо расонидани чунин қарордод имкониятҳои зиёдеро, аз қабили: мубодила миёни ҳайати профессорон ва донишҷӯён, иштирок дар фестивалҳои эҷодӣ ва конкурсҳои байналмилалии мусиқии касбӣ, корҳои илмӣ-тадқиқотӣ ва ғайра ба вуҷуд меорад.