Хусумати шахсӣ Шабнами 20-соларо бистарии бемористон кард

Душанбе, 1 октябр. (АМИТ «Ховар», Фарзона Ашӯрмадова).-Хусумати шахсӣ Шабнами 20-соларо бо ҳашт корди дар баданаш зада бистарии бемористон кард.Тавре ки дар ин бора сомонаи Вазорати корҳои дохилии кишвар хабар додаст, тахминан соатҳои 12-и шаби 28-уми сентябри соли равон ба ШВКД дар ноҳияи Ҷалолиддини Румӣ шаҳрванд Ҳотамбӣ Муҳиддинова, сокини ноҳияи мазкур ва модари Шабнами 20-сола муроҷиат намудааст, ки шахси номаълум ба воситаи тиреза ба ҳуҷраи хоби духтараш даромада, ӯро бо корди хоҷагии дар дасташ буда, ҳашт маротиба ба узвҳои баданаш задааст, ки дар натиҷа Шабнам ҷароҳати вазнини ҷисмонӣ бардошта, дар беморхона бистарӣ гардидааст.Ба иттилои манбаъ, зимни гузаронидани чорабиниҳои фаврӣ-ҷустуҷӯӣ аз ҷониби кормандони милитсия бо гумони қасдан расонидани зарари вазнин ба саломатии шаҳрванд, Сайҷафар Олимови 39-солаи сокини ноҳияи Қумсангир дастгир шуд. Гуфта мешавад, ки ҷинояти мазкур, аз сабаби хусумати шахсӣ содир шудааст. Далели шайъӣ гирифта шуд. Нисбат ба ҳодисаи мазкур парвандаи ҷиноӣ оғоз гардида, тафтиш идома дорад.