Мулоқоти Эмомалӣ Раҳмон бо Ҳомид Карзай

Душанбе, 21 октябр. (АМИТ «Ховар», Афшини Муқим).- Имрўз Президенти Ҷумҳурии Афғонистон Ҳомид Карзай ҷиҳати анҷом додани сафари расмӣ ба Тоҷикистон ташриф овард. Иҷрои тарҳҳои муштарак дар заминаи тавсеаи ҳамкориҳои иқтисодӣ, аз ҷумла лоиҳаи бунёди хатти интиқоли барқи КАСА – 1000, лоиҳаи сохтмони роҳи оҳани Тоҷикистон — Афғонистон – Туркманистон аз мавзуоти меҳварии мулоқоти Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Исломии Афғонистон Ҳомид Карзай буд. Роҳбарони ду кишвар зимни гуфтушунидҳо, ки дар фазои дӯстӣ ва ҳамдигарфаҳмии комил доир гардиданд, дар баробари баррасии мавзуоте, чун таъмини амнияти минтақавӣ, рушди ҳамкориҳои ду кишвар дар бахшҳои иқтисодӣ, тиҷорат, транзити молу коло ва тақвияти ниҳодҳои интизомӣ, омодагии худро ҷиҳати таъмиқи ҳамкориҳои дуҷонибаи судманд изҳор доштаву самтҳои таҳкими минбаъдаи муносибатҳои дўстонаи миёни ду кишварро муайян карданд. Инчунин бо таваҷҷуҳ ба марзи тўлонӣ ва муштараки ду кишвар масоили амнияти марзӣ ва тақвияти ҳамкориҳо дар ин бахш муҳокима гардиданд. Ҳамчунин дар давоми рўз баргузории мулоқоти ҳайатҳои васеи Ҷумҳурии Тоҷикистон ва Ҷумҳурии Исломии Афғонистон, баимзорасии санадҳо ва изҳороти муштараки матбуотӣ дар назар аст.