Нафақа дар нуҳ моҳ пурра пардохт гардид

Душанбе, 29 октябр. (АМИТ «Ховар», Л. Қосимова). — Мувофиқи таҳлилҳои муқоисавӣ шумораи умумии нафақагирон то ҳолати 1 октябри соли равон 603 ҳазору 325 нафарро ташкил дод, ки он нисбат ба семоҳаи сеюми соли 2012 бо теъдоди 17120 нафар афзоиш ёфт. Аз шумораи умумии нафақагирон 510 ҳазору 957 нафарро гирандаи нафақаи меҳнатӣ ва 92 ҳазору 368 нафарро гирандаи нафақаи иҷтимоӣ ташкил медиҳад. Андозаи миёнаи нафақа ба 180 сомонӣ баробар буда, нисбат ба ҳамин давраи соли гузашта 35,2 сомонӣ зиёд аст. Талаботи умумии моҳона бо назардошти иловапулию кўмакпулиҳо 112 млн. 212,95 ҳазор сомониро ташкил медиҳад. Теъдоди нафақагирони маъюб то ҳолати 1 июли соли 2013-ум 167 ҳазору 418 нафарро ташкил дода, талаботи моҳонаи онҳо ба 31 947,2 ҳазор сомонӣ баробар шуд. Ҳаҷми маблағи талабот барои пардохти нафақа ва дигар кўмакпулиҳо дар давраи ҳисоботӣ 1 075 501,8 ҳазор сомониро ташкил додааст, ки он пурра маблағгузорӣ гардид. Барои таъмини саривақтии нафақа ва кўмакпулиҳо дар нуҳ моҳи соли ҷорӣ аз ҷониби Кумитаи андози назди Ҳукумати Ҷумҳурии Тоҷикистон ҷамъоварии андози иҷтимоӣ дар ҳаҷми 1155,3 млн.сомонӣ ба нақша гирифта шуда буд.