Нашри Донишнома барои кӯдакон

Душанбе, 25 октябр. (АМИТ «Ховар», Ҳотам Рабиев).- Кӯдакону наврасони Тоҷикистон соҳиби китоби гаронбаҳо хоҳанд гашт, зеро аз ҷониби кормандони Сарредаксияи илмии Энсиклопедияи миллии тоҷик бори нахуст дар ҷумҳурӣ «Донишномаи мухтасари кӯдакон ва наврасон» дар нашриёти «Эр-граф» бо теъдоди 800 нусха нашр гардид. Китоб бо расму мусаввараҳои ҷолиб, маводи хонданбоб хеле шавқовар буда, барои чӣ хурдсолону чӣ калонсолон хеле зарур аст.«Донишнома» маълумоти мухтасар ва умумиро дар хусуси таърихи аҳди бостон, падид омадани тамаддун, муъҷизаҳои таърихии олам, дар шинохти ниёгони тоҷикон, давлатҳо ва сулолаҳои ҳукмрони эронитаборон аз қадим то давраи нави таърихӣ, маълумот дар бораи кайҳон ва ҷирмҳои осмонӣ, техника, олами ҳайвоноту набобот ва одам, маълумоти мухталифи ҷуғрофӣ, санъат ва ғайраро дар бар мегирад. Бештари маводи ин китоб вобаста ба таърихи миллати тоҷик ва ғановати табиии Тоҷикистон аст. «Донишнома» барои кӯдакони аз 8 — сола боло ва доираи васеи хонандагон пешниҳод мегардад.