“Ошёни дониш ва хизматрасонӣ” – ошёни аҳли маърифат

Душанбе, 9 октябр. (АМИТ «Ховар», Афшини Муқим).- “Ошёни дониш ва хизматрасонӣ”, ки бо ташаббуси бевоситаи раиси шаҳри Душанбе М. Убайдуллоев таъсис гардидааст,  беш аз як моҳ мешавад дар хизмати сокинон ва меҳмонони пойтахт қарор дорад. Ҳоло аҳли илму маърифат, донишҷӯёну хонандагон ва онҳое, ки ба илму фарҳанг дилбастагӣ доранд, ҳамарӯза ба ин боргоҳи маданият омада, аз он фаровон истифода мекунанд. Ҳамакнун, сокинон имкон пайдо намуданд, ки аз фурӯшгоҳи бузурги китоб, ки дар ин маҷмаа ҷойгир мебошад, дилхоҳ китоби лозимиро пайдо ва бо нархи дастрас харидорӣ намоянд. 
Дарвоқеъ, имрӯз “Ошёни дониш ва хизматрасонӣ” ба бузургтарин маркази фурӯши китоб ва хизматрасонии иттилоотию маърифатӣ табдил ёфтааст. 
Пешниҳод гардидани анвои гуногуни китобҳои илмию оммавӣ, бадеӣ, ашъори шоирони маъруфи Тоҷикистону ҷаҳон, адабиёти кӯдакона ва рӯзномаю маҷаллаҳои хонданӣ дар ин кохи маърифат боиси фараҳмандии доираи васеи хонандагон гардидааст. 
Ба қавли роҳбарияти  маҷмааи “Ошёни дониш ва хизматрасонӣ” дар ояндаи наздик дар назар аст, ки дар таҳхонаи ин маҷмаа китобхонаи электронии фарогири беш аз 1 миллион нусха китоб ва пайванд бо тамоми китобхонаҳои электронии ҷаҳон  таъсис дода шавад.