Оё муовинони раиси шаҳр аз танбеҳ хулоса мебароранд?

Душанбе, 8 октябр.(АМИТ «Ховар», Марзия Саидова).-Ахиран шаҳрдори Душанбе Маҳмадсаид Убайдуллоев муовини соҳавии худ Абдулҳақ Оевро, ки масъул ба бахши нақлиёти пойтахт аст, танбеҳ дод. Сабаби танбеҳ гирифтани А.Оев ба ҳал накардани муроҷиати раиси маҳаллаи Авул -1 дар мавриди то маҳаллаи Авул-2 тамдид кардани хатсайри автобуси №37 рабт дорад. Ҳамзамон раиси шаҳр ба масъулини Кумитаи заминсозии шаҳр ҷиҳати сари вақт ҷудо накардани қитъаи замин ба сокинони маҳаллаи Саҳбо танбеҳ эълон намуд.   Раиси шаҳр дар ҷаласа бо қатъият гуфтааст, ки дар мавриди идома ёфтани беэътиноӣ дар робита ба муроҷиати шаҳрвандон нисбат ба масъулини ниҳодҳои марбутаи пойтахт чораҳои шадидтар рӯи даст гирифта, аввал танбеҳ. сипас то ба ҳадди озод намудан аз вазифа ва мансаб расонида хоҳад шуд.