Раиси вилояти Сугд ба ниёзмандон кӯмак мерасонад

Хуҷанд, 10 октябр. (АМИТ «Ховар», Ситора Раҷабова)-Дирӯз Қоҳир Расулзода, раиси вилояти Суғд дар ҷамоати деҳоти Ғозиёни ноҳияи Бобоҷон Ғафуров ба манзили сокини ин ҷамоат, зани бесарпаноҳ Наҷминисо Ёрматова омада, дар шодиву сурури оилаи ӯ шарик гардид, зеро дар ин рӯз Наҷминисо Ёрматова, ки солҳои дароз дар шароити вазнин дар як хонаи кӯчак бо се фарзандаш зиндагӣ дошт, ниҳоят соҳиби сарпаноҳ гардид. Раиси вилоят ба Ёрматова калиди хонаи истиқоматиро тақдим карда, туҳфаҳои хотиравӣ эҳдо намуда, аҳли ин оиларо ба муносибати фарорасии Иди Қурбон таҳният гуфта, изҳор дошт, ки аз ҷониби мақомоти иҷроияи ҳокимияти давлатии вилоят ба табақаҳои ниёзманди ҷомеа ҳамеша эътибори ҷиддӣ зоҳир мешавад. Дар ин рӯз шодиву сурури сокини ҷамоати деҳоти Зарҳалоли шаҳри Истаравшан Маърифат Раҷабоваро низ ҳадду канор набуд, зеро М. Раҷабова пас аз солҳои тӯлонии беманзилӣ бо дастгирии мақомоти иҷроияи ҳокимияти давлатии вилоят соҳиби сарпаноҳ гардид. Қоҳир Расулзода пас аз супоридани калиди хонаи истиқоматӣ аз дохили он дидан карда, ба корҳои сохтмонӣ баҳои баланд дод.