Семинар барои хизматчиёни давлатӣ

Турсунзода, 24 октябр. (АМИТ «Ховар», Ҳотам Рабиев).- Дар шаҳри Турсунзода давраи омӯзишӣ барои котибони ҷамоатҳои шаҳрак ва деҳоти шаҳру ноҳияҳои тобеи ҷумҳурӣ идома дорад. Мавзӯи асосии давраи омӯзишӣ «Татбиқи қонунгузории хизмати давлатӣ дар мақомоти худидоракунии шаҳрак ва деҳот» буда, то 26 октябр давом мекунад.Дар назди шунавандагон Гурез Қосимов- муовини сардори раёсати хизмати давлатии назди Президенти Ҷумҳурии Тоҷикистон, Гавҳар Шарофзода- ректори Донишкадаи идоракунии давлатии назди Президенти Ҷумҳурии Тоҷикистон, Ҳомидхон Нуриддинов-муовини ректор оид ба таълим ва дигарон сухан мегӯянд.Чунин курсҳои такмили ихтисоси хизматчиёни давлатӣ имкон медиҳанд, ки савияи дониши кормандони ҷамоатҳо ва мақомоти иҷроия баланд гардад ва онҳо дар хизмати халқу ватан ҳамаҷониба омода бошанд.