Шурӯи фаъолияти дубораи «Суғдиён»

Кӯлоб, 18 октябр. (АМИТ «Ховар», С. Холов).-Ҷамъияти саҳомии кушодаи «Суғдиён» дар шаҳри Кӯлоб ба истеҳсоли орд машғул аст ва  солҳои тӯлонӣ таъмир нагардидани таҷҳизоту  биноҳои он ба сифати маҳсулоти тайёр таъсири манфӣ мерасонид. Аз моҳи майи соли 2013 бо мақсади навсозӣ ва таҷдиди корхонаи   «Суғдиён»  Агентии захираҳои моддии давлатии назди Ҳукумати Чумҳурии Точикистон сафарбар гардид ва бо фармоиши агентии мазкур аз ҳисоби маблағҳои буҷавӣ аз ширкати «Еркан макина»-и давлати Туркия дастгоҳҳои ҳозиразамони  коркарди гандуми истеъмолӣ ва истеҳсоли маҳсулоти тайёр харид шуданд. Дар айни замон васлу насби дастгоҳҳои мазкур, ки аз тариқи компютер идора мешаванд, аз ҷониби мутахассисони Туркия ва мутахассисони маҳаллӣ идома дорад. Дастгоҳҳои мазкур аз ҷиҳати истифодаи қувваи барқ нисбат ба таҷҳизоти пешин ду баробар камхарҷ мебошанд ва сифати маҳсулот низ беҳтар хоҳад шуд. Дар баробари насби таҷҳизот бо ҷалби беш аз 40 нафар сохтмончиёни маҳаллӣ таъмиру навсозии биноҳо, тарозуҳо ва анборҳои нигоҳдории маҳсулот идома дорад. Дар рӯзҳои наздик корҳои васлу насби таҷҳизот ва таъмиру барқарорсозӣ анҷом ёфта, корхона ба фаъолият шуруъ хоҳад кард.