Қадрдонӣ аз ғолибони озмуни 5- уми Аврупо ва Осиё

Душанбе, 29 ноябр. (АМИТ «Ховар, Зарангези Латиф).-Имрӯз вазири маориф ва илми Ҷумҳурии Тоҷикистон Нуриддин Саидов ғолибони озмуни 5-уми байналхалқии Аврупо ва Осиё аз фанни технологияи информатсионӣ ва коммуникатсиониро қадрдонӣ намуд. Ба ғолибони озмун дар ҳузури кормандони дастгоҳи марказии Вазорати маориф ва илм, роҳбарони сохторҳои тобеи он, сардорони раёсат ва мудирони шуъбаҳои маорифи вилоят, шаҳру ноҳияҳои ҷумҳурӣ туҳфаҳои хотирмон супорида шуд. Ёдовар мешавем, ки рӯзҳои 23-25 ноябри соли равон дар шаҳри Алмаатои Ҷумҳурии Қазоқистон олимпиадаи 5-уми байналхалқии Аврупо ва Осиё баргузор гардид. Дар кори он беш аз 250 даста иштирок намуд. Дастаи аввали Тоҷикистон дар ҳайти Меҳрубон Тураев, Хайём Раҳмонов ва Фаррух Каримов сазовори ҷои аввал ва медали тилло ва дастаи дуюми ҷумҳурӣ – Акмал Сафаров, Дилшод Ғаффоров ва Ғафурова Зарнисо ҷои сеюм гардиданд.Аъзои дастаҳо хонандагони синфҳои 10 ва 11-и гимназия-интернати Тоҷикистону Россия «Ҳотам ва ПВ» мебошанд. Дар ин бора котиби матбуотии Вазорати маориф ва илми ҷумҳурӣ Маҳмудхон Шоев иттилоъ дод.