Қатъи роҳи навбатии интиқоли маводи нашъадор

Душанбе, 6 ноябр. (АМИТ «Ховар», Лайло Қосимова). -Кормандони Агентии назорати маводи нашъаовари назди Президенти Ҷумҳурии Тоҷикистон шаҳрванди ҷумҳуриро, ки мехост маводи нашъадорро дар ҳаҷми ниҳоят калон бо роҳи қочоқ аз ҳудуди Ҷумҳурии Тоҷикистон ба кишварҳои ИДМ интиқол диҳад, дастгир карданд.
Дар натиҷаи гузаронидани амалиёти махсус дар ҳудуди шаҳри Душанбе бо гумонбарӣ дар қочоқи маводи нашъадор мошини тамғаи «Toyota Corolla», ки таҳти идораи сокини 39-солаи ноҳияи Ҳамадонии вилояти Хатлон боздошт  шуд. Дар вақти азназаргузаронии автомобил, дар ҳузури шахсони холис аз боғоҷи он 22 адад баста, ки  ранги ҷигарӣ бо бӯи махсус дошт, ошкор ва мусодира гардид. Бастаҳо бо навиштаҷоти арабӣ ороиш ва номгузорӣ шуда буданд. 
Ташхиси криминалистӣ нишон дод, ки маводи мусодирашуда ҳашиш буда, вазни умумиаш 22 кило мебошад. Ҳамзамон муайян карда шуд, ки дастгиршуда барои содир намудани ҷинояти вобаста ба муомилоти ғайриқонунии маводи нашъадор  соли 2007 суд шуда, барои ҷинояти содиркардааш чанд сол дар маҳбас буд. 
Дастгиршуда ба тавқифгоҳи нигоҳдошти муваққатии АНМН ворид карда шуд. Мутобиқи Кодекси ҷиноии Ҷумҳурии Тоҷикистон барои содир намудани ҷинояти вобаста ба муомилоти ғайриқонунии маводи нашъадор  ба дастгиршуда ба муҳлати аз 12 то 20 сол маҳрум шудан аз озодӣ пешбинӣ шудааст.
Дар айни замон гуруҳи тафтишотию фаврии  агентӣ ҷиҳати ошкор ва дастгир кардани дигар ҳаммаслакони ҷинояткори мазкур тадбирҳои мушаххас андешида истодаанд.