Ҷинояткориро ҷилавгирӣ мебояд

Душанбе,4 ноябр. (АМИТ «Ховар», Раъно Нусратуллоева).-Тибқи иттилои кормандони раёсати мубориза бо гардиши ғайриқонунии маводи нашъаовар, ки 2-юми ноябри соли ҷорӣ зимни мулоқот бо донишҷӯёни Донишгоҳи давлатии омӯзгории Тоҷикистон ба номи С.Айнӣ изҳор доштанд, шумораи ҷиноятҳои содирнамудаи муҳассилини макотиби олии кишвар дар 9 моҳи сипаришуда 72 ададро ташкил медиҳад. Боиси таассуф аст, ки бо вуҷуди татбиқи  тадбирҳое, ки ба ҷилавгирӣ аз аъмоли номатлуб вобастаанд, раванди ҷинояткорӣ дар муқоиса ба соли гузашта коҳиш наёфтааст,-хабар дод котиби матбуоти Донишгоҳи омӯзгорӣ Бахтиёри Абдураҳим.
Дар ҳамоиш зикр шуд, ки муноқишаю кашмакашҳо, аз қабили занозанӣ ва кордкашӣ миёни толибилмони ҳам макотиби олӣ ва ҳам миёна афзоиш ёфтааст. Теъдоди ин гуна ҷиноятҳо 20 ҳолат мебошад, ки воқеан ҳам, боиси ташвиш ва нигаронии ҷиддист.
Дар такя бар қавли кормандони раёсати мубориза бо гардиши ғайриқонунии маводи нашъаовар, садамаҳои нақлиётӣ низ дар қиёс ба ҳамин давраи соли сипаришуда хеле бештар мебошад ва нисбат ба соли рафта имсол шумораи садамаҳо 34 ҳолат ва талафоти ҷонӣ 25 ҳолат зиёд аст. 
Дар натиҷаи рейдҳои ҷорӣ ва махсус 172 ҳолати истифодаи мошинҳои шахсӣ аз ҷониби донишҷӯён ҳангоми ҷараёни таълим ошкор гардид ва бо айби толибилмон 9 садама ба амал омадааст.
Намояндагони мақомоти қудратӣ, ҳамчунин таъкид доштанд, ки дар давоми соли равон 748 нафар бо ҷурми нашъаҷаллобию нашъамандӣ дастгир шуданд, ки 279 нафари онҳо ҷавонон мебошанд. Дар айни замон дар бемористонҳои махсус 7590 нафар нашъаманд табобат мегирад, ки 2329 нафараш ҷавон ҳаст.