Ба буҷет нисбат ба нақша кам маблағ ворид шудааст

Ноябрь 18, 2013 16:45

Душанбе, 18 ноябр.(АМИТ «Ховар», Марзия Саидова).- «Дар давраи ҳисоботӣ ҳаҷми маҷмӯи маҳсулоти дохилӣ дар ҷумҳурӣ 27,6 миллиард сомониро ташкил дода, афзоиши реалии он ба 7,4 % баробар гардид, ки он нисбат ба ҳамин давраи соли гузашта 2 миллиарду 755 миллион сомонӣ ё 11,1 % зиёд аст». Ин матлабро Сафаралӣ Раҷабов-раиси Кумита оид ба иқтисод ва молияи Маҷлиси намояндагон 18 ноябр дар ҷараёни муҳокимаи парлумонӣ, ки доир ба иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2013» бахшида шуда буд, иброз дошт. Мавсуф гуфт, ки афзоиши рушди иқтисодиёт дар ҳамаи соҳаҳои хоҷагии халқи мамлакат таъмин гардида, истеҳсоли маҳсулоти саноатӣ ба 4, 2 %, кишоварзӣ 9,3% , гардиши чакана ба 17,2 % ва хизматрасониҳои пулакӣ ба 11,2 % нисбат ба соли гузашта зиёд шудаанд. Дар ин давра идораи молиявии давлатӣ зери назорати доимӣ қарор дошт ва ин имконият дод, ки иҷрои буҷети давлатӣ 100, 1% таъмин гардад, таъкид кард Сафаралӣ Раҷабов. Зикр шуд, ки дар ин давра аз ҳисоби фаъолияти иқтисоди беруна ба буҷети кишвар 2 миллиарду 305 миллион сомонӣ ворид гардид, ки ин омор нисбат ба ҳамин давари соли гузашта 330, 1 миллион сомонӣ зиёд аст. Аз ҳисоби даромадҳои андози дохилӣ ба буҷет 4 миллиарду 201 миллион сомонӣ маблағ ворид гардидааст, ки он 101 % -и нақшаро ташкил дода, нисбат ба нақша 42,5 миллион сомонӣ ва дар қиёс ба ҳамин давраи соли гузашта 647,6 миллион сомонӣ зиёд аст. Раиси Кумитаи Маҷлиси намояндагон гуфт, ки новобаста аз таъмини иҷрои нақшаи даромади буҷети давлатӣ дар ин самт камбудию норасоиҳо ҷой дошта, на ҳамаи захираҳои мавҷудаи молиявӣ ба буҷет пурра ворид шудаанд, ки дар натиҷа даромади буҷети ҷумҳуриявӣ 99, 6 % иҷро гардида, ба буҷет нисбат ба нақшаи пешбинишуда 16 миллион сомонӣ кам ворид карда шуд. Дар муҳокимаи парлумонӣ ҳамзамон роҳбарону намояндагони вазорату идораҳои марбутаи кишвар — вазири молияи ҷумҳурӣ Сафаралӣ Наҷмиддинов, раиси Кумитаи андози назди ҳукумати ҷумҳурӣ Нусратулло Давлатов, муовини сардори Хадамоти гумруки назди ҳукумати ҷумҳурӣ Нуриддин Маҳмадов ва дигар намояндагони мақомоти масъули кишвар оид ба паҳлуҳои иҷрои буҷети давлатии ҷумҳурӣ дар зарфи 9 моҳи соли равон гузориш доданд.

Ноябрь 18, 2013 16:45

Хабарҳои дигари ин бахш

Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 16 дараҷа гарм мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Имрӯз дар водиҳои Тоҷикистон ҳаво 18 дараҷа гарм мешавад
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд