Баррасии лоиҳаи 32- моҳаи Иттиҳоди Аврупо дар Душанбе

Душанбе, 27 ноябр. (АМИТ «Ховар», Фарзона Ашӯрмадова).- «Сифати зиндагӣ барои ҳама- афзун намудани дастрасӣ ба хизматрасониҳои иҷтимоӣ барои кӯдакони имконияташон маҳдуд ва оилаҳои онҳо дар вилояти Хатлон»- таҳти чунин ном Иттиҳоди Аврупо лоиҳаи 32- моҳаро дар шаҳрҳои Кӯлоб ва ноҳияи Восеъ амалӣ мегардонад.Лоиҳаи мазкур аз ҷониби Ташкилоти «Handicap International» (Барномаи Осиёи Марказӣ дар Тоҷикистон) пешниҳод ва ташкил шуда, аз ҷониби Иттиҳоди Аврупо маблағгузорӣ мешавад.Дар конфронсе, ки дирӯз, 26-уми ноябр дар меҳмонхонаи Тоҷикистон таҳти унвони «Тавонбахшӣ дар сатҳи ҷомеа дар Тоҷикистон: тавсияҳо барои оянда» доир гардид, дар он муваффақиятҳо, мушкилиҳо сабақҳои омӯхташудаи лоиҳаи мазкур аз ҷониби намояндагони Иттиҳоди Аврупо дар Тоҷикистон ва сафорати ИМА дар Душанбе, инчунин намояндагони ташкилотҳои ҷамъиятии вилояти Хатлон баррасӣ гардид.Гуфта мешавад, ки лоиҳаи мазкур дар 21 деҳа аз ҷониби ду ташкилоти ҷамъиятии дар шаҳри Кӯлоб буда амалӣ мегардад.