Баррасии сифати хизматрасониҳои давлатӣ дар Душанбе

Душанбе, 25 ноябр. (АМИТ «Ховар», С. Солеҳ ).- 27 ноябр дар Душанбе шуъбаи Ташкилоти байналмилалии Институти «Ҷамъияти Кушода» — Бунёди Мадад дар Тоҷикистон дар чорчӯбаи барномаи «Ташаббусҳои шаффофият ва зерҳисоботӣ» конфронси байналмилали дар мавзӯи «Хидматрасониҳои давлатӣ: дастрасӣ ва сифат»-ро баргузор мекунад.Мақсад баррасии таҷрибаи байналмилалӣ оид ба пешниҳоди хизматрасонии давлатӣ, баландбардории дастрасӣ ва сифатнокӣ, механизми мониторинги ҷамъиятии сифати хизматрасониҳои давлатӣ, таҳияи номгӯ ва стандарткунонии хизматрасониҳои давлатӣ, имконияти истифодаи таҷрибаи мавҷуда дар Ҷумҳурии Тоҷикистон мебошад. Ҷовид Муқим, корманди масъули Ташкилоти байналмилалии Институти «Ҷамъияти Кушода» — Бунёди Мадад дар Тоҷикистон, бо таъйиди ин хабар ба АМИТ «Ховар» гуфт: «Дар конфронс иштироки намояндагони сохторҳои давлатӣ ва ташкилотҳои ҷамъятии Украина, Гурҷистон ва Қирғизистон пешбинӣ шудааст». Ҳамчунин ба гуфтаи мавсуф барои иштирок дар конфронс намояндагони вазорату идораҳои давлатӣ, ташкилоти ғайридавлатӣ ва байналмилалӣ, коршиносони мустақил ва намояндагони илму маорифи Тоҷикистон даъват мешаванд.