Чанд хабар аз хориҷи кишвар

Мусодираи кокаин дар Испания Душанбе, 21 ноябр. (АМИТ «Ховар»).-Мақомоти махсуси Испания зимни амалиёт дар яке аз биноҳои истиқоматии шаҳри Валенсия ним тонна кокаинро дарёфт ва мусодира намуданд. Аз рўи ҳисобҳои мутахассисон арзиши кокаини мусодирагардида дар бозори сиёҳ 10 миллион евроро ташкил медиҳад. Мувофиқи иттилои расида, маводи мухаддирро аз Амрикои Лотинӣ ба Испания ворид намудаанд. Бояд гуфт, ки мақомоти махсус ҳамчунин дар шаҳри Мадрид се нафар қочоқбари маводи мухаддирро дастгир карданд, ки дар яке аз манзилҳои зист ба хариду фурўши кокаин машғул будаанд. Боришоти зиёди барф дар давлатҳои АврупоДушанбе, 21 ноябр. (АМИТ «Ховар»).-Дар минтақаҳои қисми ҷанубии давлатҳои Аврупо ҳаво якбора сард гардида, боришоти зиёди барф ба амал омад. Боридани барф ба сокинони як қатор шаҳрҳои Фаронса мушкилоти зиёд пеш овард. Лозим ба ёдоварист, ки боридани барфи зиёд бо суръати баланд ва вазидани шамол мушкилоти сокинони Испанияро низ дучанд намудааст. Кормандони марказҳои ҳавошиносӣ иброз медоранд, ки суръати вазиши шамол дар як соат 100 километрро ташкил дода, ба хароб гардидани иншоотҳои зиёд боис мегардад. Мутахассисон пешгўӣ мекунанд, ки чунин номусоидии вазъи ҳаво боз чанд рўзи дигар идома хоҳад кард. Сӯхтор дар МаскавДушанбе, 21 ноябр. (АМИТ «Ховар»).-Дар анборҳои маҳсулоти пластикӣ ва коғази шаҳри Маскави Федератсияи Русия сўхтори шадид ба амал омад. Мувофиқи иттилои расида, алангаи оташ дар муддати нисбатан кўтоҳ масоҳати 4 ҳазор метри мураббаъро фаро гирифт. Бар асари оташсўзӣ се нафар кормандони анбор ҷароҳат бардоштаанд. Кормандони Хадамоти оташнишонӣ тавонистанд, ки дар муддати чанд соат сўхторро хомўш созанд. То ҳол сабаби асосии ҳодиса муайян нашудааст ва тафтишот дар ин самт идома дорад. Ҳамлаи Амрико ба ПокистонДушанбе, 21 ноябр (АМИТ «Ховар»).-Ҳавопаймоҳои бесарнишини Иёлоти Муттаҳидаи Амрико қароргоҳи террористонро дар шаҳри Ҳангуи қисми шимолии Покистон мавриди ҳамла қарор доданд. Бар асари ин ҳодиса 5 нафар ба ҳалокат расида, 4 каси дигар ҷароҳатҳои гуногун бардоштанд. Тарҷумаи Иброҳими Ҳабибуллоҳ