Даъвати ҷаласаи якҷояи ММ ва МН МО дар Душанбе

        Душанбе, 5 ноябр.(АМИТ«Ховар», Марзия Саидова).-16 ноябри соли 2013 дар шаҳри Душанбе ҷаласаи шашуми якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати чорум баргузор мегардад. Дар ин хусус Маҳмадсаид Убайдуллоев-раиси Маҷлиси миллии Маҷлиси Олии ҷумҳурӣ қарори марбута ба тасвиб расонд.
           Интизор меравад, ки дар ҷаласаи муштараки палатаҳои болоӣ ва поёнии Парлумони мамлакат маҷмӯи масъалаҳои марбут ба рушди ҳаёти сиёсию иқтисодӣ ва иҷтимоии кишвар матраҳ хоҳанд гашт.  
    Бояд тазаккур дод, ки дар ҷаласаи қаблӣ, яъне ҷаласаи  панҷуми якҷояи Маҷлиси миллӣ ва Маҷлиси намояндагони Маҷлиси Олии ҷумҳурӣ, ки  30 августи соли равон баргузор гардида буд, дар он бо қарори ҳар ду палатаи Парлумон  рӯзи баргузории интихоботи Президенти  Ҷумҳурии Тоҷикистон дар санаи 6 ноябри соли 2013, яъне дар Рӯзи Конститутсия таъйин гардид.