Хизматрасонии иҷтимоӣ беҳбуд меёбад

Кӯлоб, 20 ноябр. (АМИТ «Ховар», С. Холов). — Бо мақсади  фаъолияти якҷоя ва босамари ҳамаи бахшҳои соҳаи ҳифзи иҷтимоии аҳолӣ дар маркази шаҳри Кӯлоб бинои чорошёна  барои  бахшҳои соҳаи ҳифзи иҷтимоии аҳолӣ мавриди истифода қарор гирифт, ки он бо харҷи беш аз 6 миллион сомонӣ бунёд ёфтааст. Кунун имкон фароҳам омад, ки ҳамаи   хадамоти хизматрасонии давлатӣ ба табақаҳои иҷтимоии аҳолӣ, аз ҷумла нафақагирону маъюбон дар як ҷо бо механизми «Равзанаи ягона» фаъолият кунанд. Чунин тарзи кор ҳам ба ходимони ин идораҳо ва ҳам ба ниёзмандон қулай аст. 
Бино аз 80 утоқи корӣ иборат буда, дар он барои беш аз 100 нафар шароити хуби корӣ муҳайё гардидааст ва кормандони соҳа имкон пайдо намуданд, ки хизматрасониро ба ин табақаи аҳолӣ дар сатҳи баланд ба роҳ монанд.  Дар ин бино ҳамчунин филиали маҳаллии Маркази ҷумҳуриявии таълими калонсолон ҷойгир шудааст, ки дар як вақт то 100 нафарро бо ҳунаромӯзӣ ва бозомӯзӣ фаро мегирад.