Китоби тозанашри Гул Шералӣ

Душанбе, 23 ноябр. (АМИТ «Ховар», Фарзона Ашӯрмадова).- «Энергетика ва саноати Тоҷикистон: марҳилаҳои нави рушд»- таҳти чунин ном китоби собиқ вазири энергетика ва саноати Тоҷикистон Гул Шералӣ ба нашр расид.Мундариҷаи китоби тозанашр ба масоили рушди соҳаҳои энергетика ва саноати Тоҷикистон, зинаҳои болоравии он, дастовардҳои тўли солҳои истиқлолияти кишвар бахшида шуда, саҳми соҳаҳои мазкурро дар рушди маҷмӯи иқтисодиёти мамлакат инъикос менамояд. Китоби мазкур аз таҷлили васеи комплекси сўзишворию энергетикӣ, бахусус, соҳаҳои гидроэнергетика, энергияи дар иншоотҳои барқу гармидиҳӣ ва манбаъҳои барқароршаванда тавлидшаванда, соҳаҳои истихроҷ ва коркарди ангишт ва нафту газ, муайян намудани мақсаду вазифаҳо ва роҳу воситаҳои ноилшавӣ ба он иборат мебошад.Китоби «Энергетика ва саноати Тоҷикистон: марҳилаҳои нави рушд»дар асоси истифодаи самараноки захираҳои инсонӣ ва табиӣ ҳамчун заминаҳои асосии рушди иқтисодиёт тағйироти сифатан ва шаклан куллии соҳаҳои энергетика ва саноати ҷумҳуриро пешниҳод намуда, дар расидан ба ҳадафҳои асосии «Стратегияи рушди миллии Тоҷикистон» саҳмгузор хоҳад буд.