Мирзо Маҳмадҷонов аз олам даргузашт

Душанбе, 5 ноябр. (АМИТ «Ховар»).- Собиқадори  футболи тоҷик,  аввалин  президенти Федератсияи  футболи  Тоҷикистон  Мирзо  Маҳмадҷонов  баъди  бемории  тӯлонӣ  4  ноябр аз олам  даргузашт.
 
Мувофиқи  маълумоти  Федератсияи  футболи  Тоҷикистон, моҳи  декабри  соли  ҷорӣ  Мирзо  Мамадҷонов  бояд  70 – сола  мешуд.  Тамоми ҳаёти  марҳум  бо  футбол  алоқаи   зич  дошт. Мирзо  Мамадҷонов  довари  дорои  дараҷаи умумииттиҳодӣ  буда, бозиҳои  мусобиқоти  иттиҳодиро  доварӣ  мекард.  Ӯ  солҳои 90 – уми  асри  гузашта  ба  ҳайси  мураббии  клубҳои  Тоҷикистону  Ӯзбекистон фаъолият  дошта,  соли  1992  президенти  Федератсияи  футболи  Тоҷикистон  гардид. Солҳои  гуногун  ба  ҳайси  ноиби президенти  Федератсияи  футболи  Тоҷикистон  кор  мекард.  Соли  гузашта  роҳбари  комиссияи  доварону  нозирони  Федератсияи  футболи  ҷумҳурӣ  таъин  шуда буд.