Намоишномаи адиби фаронсавӣ дар театри Кӯлоб

Кӯлоб, 23 ноябр. (АМИТ «Ховар», Сулаймон Холов).- Дар театри вилоятии мусиқию мазҳакавии ба номи Сайдалӣ Вализодаи шаҳри Кӯлоб бо коргардонии ҷолиб намоишномаи «Пулдон» аз рӯи асари адиби Фаронса Эжен Лабиш дар таҳия ва тарҷумаи устоди санъати театрии кишвар Малика Ҷӯрабекова рӯи саҳна омад. Хати сабзи ин намоишномаро соддагиву ростқавлии сокинони як музофот ташкил медиҳад, ки аз ҳар моҷарову сиёсат ва кинаву адоват дуранд ва ҳар яке дар ҷустуҷӯи маҳаки хушбахтист. Ба гуфти санъатшинос Малика Ҷӯрабекова рисолати аслии театр ҳамин аст, ки ба мардум воқеан ҳам фараҳу неру бахшад.Дар нахустнамоиши асар, ки мутахассисони соҳаи театр ширкат доштанд, бозии ҳунармандони театрро хеле ҷолиб ва мутобиқ ба давру замон арзёбӣ намуданд. Ороиши саҳна, мусиқӣ ҷараёни онро хеле ҷолиб карда буд. Пас аз намоишнома таҳлили касбии он сурат гирифт ва таъкид рафт, ки бо назардошти коркард, бандубаст ва бартараф намудани камбудихо ин шоҳасари ҷаҳонӣ дар барномаи Театри мусиқию мазҳакавии ба номи С. Вализода мавқеи хосса касб намуда, сертамошобинтарин намоишнома хоҳад шуд.