Низоми имтиҳонҳои марказонидаи дохилшавӣ

Душанбе, 27 ноябр. (АМИТ «Ховар», Зарангези Латиф).- Имрӯз 27-уми ноябр, дар маҷлисгоҳи “Душанбе-Плаза”-и шаҳри Душанбе Маркази миллии тестӣ дар якҷоягӣ бо Вазорати маориф ва илми Ҷумҳурии Тоҷикистон, бо дастгирии Барномаи ҳамкории рушди таҳсилоти Федератсияи Русия(READ), Бонки ҷаҳонӣ ва шуъбаи ташкилоти байналмилалии Институти«Ҷамъияти Кушода» — Бунёди Мадад дар Тоҷикистон муаррифии «Низоми имтиҳонҳои марказонидаи дохилшавӣ ба муассисаҳои таҳсилоти олии касбии Ҷумҳурии Тоҷикистон» баргузор гардид. Тавре ки сухангӯи Вазорати маориф ва илми ҷумҳурӣ Маҳмудхон Шоев иттилоъ дод, дар ин муаррифӣ муовини Сарвазири Ҷумҳурии Тоҷикистон М. Ҷабборова, вазири маориф ва илми Ҷумҳурии Тоҷикистон Н. Саидов, роҳбари шуъбаи илм ва маорифи дастгоҳи иҷроияи Президенти кишвар А. Нозимов, роҳбари барномаи READ дар Тоҷикистон аз тарафи Бонки ҷаҳонӣ С.Бозорова ва роҳбари Шуъбаи Институти «Ҷамъияти Кушода» — Бунёди мадад З.Ҳалимова, Сафири фавқулодда ва мухтори Федератсияи Русия дар Ҷумҳурии Тоҷикистон И.Лякин-Фролов,роҳбарони мактабҳои олӣ, мақомоти маҳаллии ҳокимияти давлатӣ, кормандони сохторҳои соҳаи маориф, мушовирони байналмилалӣ ва намояндагони ВАО иштирок намуданд. Ҳадаф аз баргузории ин ҷаласа ба аҳли ҷомеа ошно намудани тартибу қоидаҳо ва расмиёти имтиҳонҳои марказонидашудаи дохилшавӣ ва тақсими донишҷӯён ба донишгоҳу доникадаҳои Ҷумҳурии Тоҷикистон аст, ки тавассути Маркази миллии тестӣ аз соли 2014 оғоз мегардад.