Пешравиҳо дар соҳаи технология

Душанбе, 25 ноябр. (АМИТ «Ховар», Ҳотам Рабиев).- Бо мақсади баланд бардоштани масъулияти падару модар, беҳтар шудани ҳисси масъулиятшиносии мактаббача ва омӯзгор кормандони ҶДММ «Индекс-ТҶ» барномаи идоракунию иттилоотӣ ва таҳлилиро таҳти унвони «Таҳсил» роҳандозӣ намуданд. Барномаи «Таҳсил» ширкати ватанӣ буда, ҳамаи мутахассисони он тоҷик ҳастанд. Ин аввалин барнома дар соҳаи маориф мебошад, ки бо ин кори идораи мактаб пурра автоматӣ шудааст.Ширкати мазкур се сол боз дар ҳамкорӣ бо шуъбаи маорифи ноҳияи Бобоҷон Ғафуров аз болои ин барномаи компютерӣ кор карда, бо зиёда аз 80 мактаби шаҳру ноҳияи вилояти Суғд корҳои санҷиширо бомуваффақият ба анҷом расонд. Дар соли таҳсили 2013-2014 тафсири (версия) 3 ба истифода дода шуд, ки алҳол марҳилаи пайвастшавии он идома дорад. Тибқи иттилои кормандони ширкати мазкур ҳамаи он мактабҳое, ки дар ҳудуди ҷумҳурӣ ҳастанд, онҳо имконияти ихтиёрӣ бо ин барнома кор карданро доранд.