Сӯзонидани беш аз 146 кило маводи мухаддир дар Суғд

Душанбе, 1 ноябр. (АМИТ «Ховар, Л. Қосимова).- Дар ҳузури намояндагони мақомоти ҳифзи ҳуқуқ, сохторҳои қудратӣ ва хабарнигорони ватаниву хориҷии вилояти Суғд 146 килову 104 грамм маводи мухаддир чун далели шайъии 9 парвандаи ҷиноӣ дар печи махсуси Раёсати Агентии назорати маводи нашъаовари (АНМН) назди Президенти Ҷумҳурии Тоҷикистон дар вилояти Суғд бо роҳи сӯзонидан нобуд карда шуд.Аз миқдори умумии маводи мухаддири сӯзондашуда 79 килову 567 грамми он героин буда, 66 килову 357 грамм ҳашиш ва 180 граммро афюн ташкил дод. Ҳиссаи бештари маводи мухаддире, ки сӯзонда шуд, героин (зиёда аз 79 кило) буд, ки кормандони мақомоти ҳифзи ҳуқуқ ва сохторҳои қудратии вилоят дар ҷараёни баргузории чорабиниҳои фаврию ҷустуҷӯӣ мусодира карданд.Тавре ки аз дафтари матбуоти АНМН хабар доданд, аз рӯзи ташкили Агентии назорати маводи нашъаовар то ҳоло зиёда аз 14 тонна воситаҳои нашъадор сӯзонида шудаанд.