Сабаби реҷаи барқ – таъмиру табдили пояҳои хатти баландшиддат

Хуҷанд, 19 ноябр. (АМИТ «Ховар», Абдуаҳад  Додобоев).-  Аз  17  ноябр   тайи  ҳафт  рӯзи  минбаъда  дар  ҳудуди  вилояти  Суғд  реҷаи  барқ ҷорӣ  шудааст, ки  сабаби  он  таъмир ва  иваз  намудани яке аз  пояҳои оҳанини  хатти  баландшиддати  барқи  «Ҷануб – Шимол» аст.
 
Мувофиқи  маълумоти  шуъбаи энергетика  ва  саноати маъмурияти  вилояти Суғд, таъмиру табдили  пояи  оҳанин  дар  асоси  нақшаи  муштарак  ва  аҳди  пешакии  байни Ширкати  саҳҳомии холдингии кушодаи  «Барқи  тоҷик» ва  Ширкати ТВЕА – и Ҷумҳурии Мардумии  Чин  сурат  мегирад. Пояи  зикршудаи  хатти  баландшиддати барқ воқеъ дар  куҳпораи  наздики  нақби   Анзоби  ноҳияи  Айнӣ  бар  асари  бархӯрдан бо  санги  калон  осеб  дидааст. 
 
Шаҳрҳои Хуҷанд,  Қайроққум, Чкалов ва  як  қисми  ноҳияи  Бобоҷон  Ғафуровро  нерӯгоҳи  Қайроққум   бо  барқ  таъмин  намуда,  ба  ноҳияҳои боқимондаи  вилояти  Суғд  барқ  аз Ҷумҳурии  Қирғизистон  интиқол  дода  мешавад.