«TajChina-2013» -ро аз андоз ва боҷ озод карданд
Душанбе, 20 ноябр.(АМИТ «Ховар», Марзия Саидова).- Палатаи поёнии Парлумони Тоҷикистон бо ворид намудани тағйиру илова ба лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2013» Ҷамъияти дорои масъулияти маҳдуди «TajChina-2013» -ро аз андоз аз арзиши иловашуда ва боҷи гумрукӣ озод кард. Яъне, ширкати мазкур барои ворид намудани теника, таҷҳизоти технологӣ ва масолеҳи сохтмонӣ барои бунёди корхонаи семент дар шаҳри Ваҳдат андоз аз арзиши иловашуда ва боҷи гумрукӣ намесупорад. Гулчеҳра Бозорова –муовини вазири рушди иқтисод ва савдои кишвар, ки дар Парлумон ин масъаларо тавзеҳ медод гуфт, ки арзиши лоиҳаи корхонаи мазкур дар марҳилаи аввал 20 миллион $ ва дар марҳилаи охир 50 миллион $-ро ташкил медиҳад, ки ин муодил ба 250 миллион сомонӣ аст. Корхонаи мазкур бо технологияи ҳозиразамон ва мутобиқ ба стандартҳои экологӣ сохта шуда, иқтидори истеҳсоли солонааш 600 ҳазор тонна семент аст. Ба маблағи беш аз 9,8 миллион $ ё қариб 50 миллион сомонӣ воситаҳои техникӣ ва таҷҳизоти гуногуни корхона аз Чин ба Тоҷикистон ворид мешаванд. Корхонаи семент дар зарфи 10 моҳ сохта шуда, он имкон медиҳад, ки талаботи бозори дохилии кишвар бо семент беҳтар гардонида шавад. Ҳамзамон беш аз 250 ҷои кори нав такшил карда мешавад. Мувофиқи дурнамои нақшаи истеҳсолӣ ҳангоми бо иқтидори пурра фаъолият намудани корхонаи мазкур имкон дорад, ки маблағи умумии 360 миллион сомонӣ семент истеҳсол шуда, аз ин ҳисоб ба буҷети кишвар ба маблағи 55 миллион сомонӣ танҳо андоз аз арзиши иловашуда ворид мегардад. Абдуҳалим Қодиров –директори ҶДММ «TajChina» ва ҳамзамон роҳбари тарҳи бунёди корхонаи семент, ки дар ҷаласаи Парлумон ҳузур дошт, нисбат ба ин масъала гуфт, ки алҳол корҳои сохтмонӣ ҷиҳати бунёди корхонаи семент оғоз гардидаанд. Раванди корҳои бетонхобкунӣ ва оҳанбандӣ ҷараён дошта, дар масоҳати 13 гектар атрофи корхона девор карда шуда, дар он 150 нафар коргар фаъолият дорад. Инчунин дар оянда 200 нафар коргар аз ҳисоби мутахассисони маҳаллӣ бобати сохтмони корхонаи семент ҷалб мешаванд. Ҳамзамон аз вилояти Челябински Русия 1700 тонна оҳан иборат аз 24 вагон аз тариқи қарордод барои сохтмони корхонаи семент ба ҷумҳурӣ ворид мешавад, афзуд тоҷири шинохтаи тоҷик.








Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд






