Участкаи интихоботии №78-и Деҳлӣ пурра омода аст

 
         Душанбе, 5 ноябр.(АМИТ «Ховар», Марзия Саидова).- Ҷиҳати дар сатҳи баланд гузаронидани интихоботи Президенти Ҷумҳурии Тоҷикистон, ки фардо, 6 ноябр баргузор мегардад,  дар участкаи интихоботии №78, воқеъ дар шаҳри Деҳлӣ- пойтахти Ҳиндустон тамоми имконияту шароитҳои мусоид фароҳам оварда шудаанд. Дар сафорат гӯшаи интихоботӣ созмон дода шуда, дар он маълумот дар бораи номзадҳо ба мансаби Президенти Ҷумҳурии Тоҷикистон, барномаи номзадҳо, дастурамал оид ба интихобот ва иттилоот барои интихобкунандагон ва дигар маводу адабиёти зарурии марбут ба баргузории интихоботи Президенти Ҷумҳурии Тоҷикистон ҷо дода шудааст.
           Аз Сафорати Тоҷикистон дар Ҳиндустон ба АМИТ «Ховар» иттилоъ доданд, ки тибқи рӯйхати омодагардида аз ҷониби ҳайати комиссияи интихоботӣ, ки раисии онро Сафири Фавқулодда ва Мухтори Тоҷикистон дар Ҳиндустон Саидбег Саидов ба уҳда дорад,  30 нафар шаҳрвандони Тоҷикистон, ки дар ин кишвар кору зиндагӣ менамоянд, барои раъйдиҳӣ ба  қайд гирифта шудаанд. Ҳамзамон ба шаҳрвандони Тоҷикистон, ки дар дигар музофотҳои Ҳиндустон кор ва таҳсил менамоянд, даъватнома фиристонида шудааст, то дар ин чорабинии муҳими сиёсии аҳамияти умумидавлатӣ дошта иштирок намоянд.