Ҷашнвораи дӯстии донишҷӯён

Душанбе, 6 декабр. (АМИТ «Ховар», Марҳабо Зунунова).- Сафири Русия дар Тоҷикистон И.С. Лякин — Фролов дар Ҷашнвораи дӯстии донишҷӯён таҳти шиори «Муколамаи халқҳо, муколамаи фарҳанг», ки дар Маркази илму фарҳанги Русия баргузор гардид, иштирок намуд. Ин чорабинӣ бо ибтикори Ҷамъияти дӯстӣ ва равобити фарҳангии Тоҷикистон бо кишварҳои хориҷӣ ба Намояндагии ҳамкории Русия дар ҶТ роҳандозӣ шуд. Дар ин бора аз Сафорати Федератсияи Русия дар Ҷумҳурии Тоҷикистон ба АМИТ «Ховар» хабар доданд. Назар ба иттилои манбаъ, дар ин чорабинӣ раиси раёсати Ҷамъияти дӯстӣ ва равобити фарҳангии Тоҷикистон бо кишварҳои хориҷӣ С.Х.Хайруллоев, ректорони донишкадаҳои олии Тоҷикистон, намояндагони бархе сафоратҳо ва васоити ахбори омма, ҳамчунин донишҷӯёни хориҷии донишкадаҳои олии маҳаллӣ, аз ҷумла, донишҷӯёни Афғонистон, Эрон, Чин, Қазоқистон, Қирғизистон, Покистон ва Ҳиндустон ширкат доштанд. Сафир И.С. Лякин – Фролов зимни суханрониаш, аз ҷумла, мақоми муҳими ҷунбиши ҷавонон ба ҳайси «Дипломати мардумӣ» дар амри таҳкими сулҳу суботи ҷаҳон, ҳамчунин саҳми назарраси Ҷамъияти дӯстӣ ва равобити фарҳангии Тоҷикистон бо кишварҳои хориҷӣ ҷиҳати дӯстию ҳамфикрии байни донишҷӯёни хориҷиро қайд намуд. Дар ҳошияи ҷашнвора консерти идонаи дастаҳои ҳунарии донишкадаҳои олӣ баргузор гардид.