Ҷопон бахши таҳсилотро дастгирӣ кард

Душанбе, 27 декабр. (АМИТ «Ховар», Фарзона Достонзода).- 26 декабр раиси шаҳри Турсунзода Бобоалӣ Табаров ва Сафири Ҷопон дар Ҷумҳурии Тоҷикистон Хироюки Имахаши дар маросими татбиқи муваффақонаи Лоиҳаи бо таҷҳизоти мактабӣ таъмин намудани 6 мактаби таҳсилоти миёнаи шаҳри Турсунзода иштирок намуданд.Лоиҳаро Ҳукумати Ҷопон дар ҳошияи лоиҳаҳои ёрии маҷҷонии амнияти башардӯстона барои табақаҳои васеи аҳолӣ ба маблағи умумии 108 ҳазору 910 доллари ИМА дар амал татбиқ намуд.Тавре ки аз Сафорати Ҷопон дар Тоҷикистон хабар доданд, ба манзури фароҳам овардани муҳити беҳтари таҳсили мактабиён дар ҳошияи лоиҳаи мазкур 900 адад мизу курсӣ, 60 тахтаи дарсӣ ва 60 ҷевони китобҳо дар байни 6 мактаби таҳсилоти миёна тақсим гардид.