Ба имзо расидани як қатор қонунҳо

Душанбе, 28 декабр (АМИТ «Ховар»).- Имрӯз аз тарафи Президенти Ҷумҳурии Тоҷикистон як қатор қонунҳо, ки аз тарафи Маҷлиси намояндагон қабул гардида, Маҷлиси миллӣ онҳоро ҷонибдорӣ намудааст, ба имзо расонида шуданд.Қонунҳои Ҷумҳурии Тоҷикистон «Дар бораи таълиму тарбияи томактабӣ», «Дар бораи мубориза бар зидди ҷиноятҳои муташаккил», оид ба ворид намудани тағйиру иловаҳо ба қонунҳои Ҷумҳурии Тоҷикистон «Дар бораи энергетика», «Дар бораи сарватҳои зеризаминӣ», «Дар бораи металҳои кимматбаҳо ва сангҳои қимматбаҳо», «Дар бораи ҳифзи саломатии аҳолӣ», «Дар бораи туризм», «Дар бораи суғуртаи давлатии иҷтимоӣ», «Дар бораи илм ва сиёсати давлатӣ оид ба илму техника», кодексҳои ҷиноятӣ, гумрук ва андоз аз ҷумлаи онҳо мебошанд.Қонуни Ҷумҳурии Тоҷикистон «Дар бораи таълиму тарбияи томактабӣ» дар таҷрибаи қонунгузории кишвар нав буда, асосҳои ҳуқуқӣ, ташкилӣ, иқтисодӣ, иҷтимоӣ ва вазифаҳои таълиму тарбияи томактабӣ, забони таълиму тарбия дар муассисаи таълимии томактабӣ, намудҳои муассисаҳои таълимии томактабӣ, ташкили фаъолият ва таъмини методии раванди таълиму тарбияи томактабӣ, ҳуқук ва ӯҳдадориҳои падару модари тарбиягирандагон, масъулияти кормандони соҳаи таълиму тарбияи томактабӣ, хизматрасонии тиббӣ дар муассисаи таълимии томактабӣ ва самтҳои дигари фаъолияти онро муайян ва танзим менамояд.Қонуни Ҷумҳурии Тоҷикистон «Дар бораи мубориза бар зидди ҷиноятҳои муташаккил» низ дар таҷрибаи қонунгузории кишвар нав буда, муносибатҳои ҷамъиятиро вобаста ба ҳифзи ҳуқуку озодиҳои инсон ва шаҳрванд, шахсони ҳуқуқӣ, ҷамъият ва давлат аз ҷинояткории муташаккилона ба танзим дароварда, асосҳои ҳуқуқии сиёсати давлати Ҷумҳурии Тоҷикистонро дар самти мубориза бар зидди ҷинояткории муташаккилона муайян мекунад.Қонуни Ҷумҳурии Тоҷикистон оид ба ворид намудани тағйиру иловаҳо ба қонуни Ҷумҳурии Тоҷикистон «Дар бораи илм ва сиёсати давлатӣ оид ба илму техника» принсипҳои ахлоқии фаъолияти ходимони илмиро муайян намуда, ба таъмини беғаразии фаъолияти корманди илмӣ, ошкоро будани таҳлили танқидии таҳқиқот, меъёрҳои асосии ахлоқии танзимкунандаи фаъолияти илмӣ, масъулияти иҷтимоии корманди илмӣ, аз ҷумла масъулияти онҳоро дар самти тарбияи насли наврас дар рӯҳияи инсондӯстӣ, эҳтироми арзишҳои умумибашарӣ ба танзим медарорад.Тағйиру иловаҳо ба Кодекси ҷиноятии Ҷумҳурии Тоҷикистон ҷиҳати иҷрои тавсияҳои Ташкилоти байналмилалии Гурӯҳи татбиқи чораҳои молиявии муқовимат ба софкории пул, инчунин пурзӯр намудани муқовимат ба қонунигардонии даромадҳои бо роҳи ҷиноят бадастоварда ва маблағгузории терроризм равона карда шудааст.Қонунҳои қабулгардида дар маҷмӯъ ба ҳифзи инсон ва ҳуқуқу озодиҳои ӯ, ҳимояи манфиатҳои давлат ва ташкилоту идораҳо, ҳифзи сиҳатии омма, истифодаи оқилонаи сарватҳои зеризаминӣ, рушди илму техника, туризм, инчунин пешрафту инкишофи соҳаҳои мухталифи ҳаёти ҷомеа равона карда шудаанд.Матни пурраи қонунҳои қабулгардида рӯзҳои наздик дар матбуоти расмии кишвар интишор карда мешаванд.