Баргузории намоиши ҳунарҳои дастӣ дар Душанбе

Душанбе, 16 декабр.(АМИТ «Ховар», Сабоҳат Қадамова)-Рӯзҳои 14-15 декабри соли равон дар Маркази исмоилияи шаҳри Душанбе намоишгоҳи зимистонаи ҳунарҳои дастии косибони ватанӣ баргузор гардид.Намоиши мазкур аз ҷониби Маркази фарҳангии «Бохтар», Маркази исмоилияи шаҳри Душанбе, ҳамчунин намояндагиҳои дипломатии Олмон, ИМА ва Фаронса баргузор гардида, ҳадаф аз баргузории он нишон додани ҳунари дастии косибони тоҷик , эҳё ва густариши ҳунарҳои мардумӣ барои бозоргир кардани маҳсули косибон мебошад. Дар намоиш беш аз 70 нафар ҳунармандони тоҷик маҳсули кори худро ба маърази тамошо гузоштанд. Дар намоиш наздик ба 500 навъи либосу асбобҳои мусиқӣ, ҳалқаву муҳра ва корду дигар ашёҳои рӯзгор пешкаши иштирокчиён гардонида шуданд.