Баррасии масоили Афғонистон дар мулоқоти Эмомалӣ Раҳмон ва Николай Бордюжа

Душанбе, 26 декабр. (АМИТ «Ховар», Афшини Муқим).- Дар мулоқоти Президенти Ҷумҳурии Тоҷикистон Эмомалӣ Раҳмон ва Дабири кулли Созмони Аҳдномаи амнияти дастаҷамъӣ Николай Бордюжа масоили ҳамкориҳои амниятии Тоҷикистон ва созмони мазкур мавриди муҳокима қарор гирифтанд. Николай Бордюжа пас аз мулоқот бо Эмомалӣ Раҳмон зимни изҳороти худ гуфт: «Ҳанӯз дар ҳамоиши сарони давлатҳои аъзои созмон, ки имсол дар шаҳри Сочи баргузор гардид, роҳбарони кишварҳои аъзо ба тавофуқ расиданд, ки дар пасманзари хуруҷи неруҳои посдори сулҳ аз Афғонистон ҷиҳати таҳкими вазъи амниятии сарҳади миёни Тоҷикистону Афғонистон кӯмак ва мусоидат намоянд».«Аз ин лиҳоз, тезонидани раванди расонидани кӯмакҳои моддиву техникии кишварҳои аъзо ба нерӯҳои марзбон ва дигар ниҳодҳои марбута аз мавзуоти муҳими мулоқоти мо буд»,- иброз дошт Н. Бордюжа. Гуфта шуд, ҳамчунин дар ин дидор Э. Раҳмон ва Н. Бордюжа вазъи кунунӣ ва дурнамои Афғонистонро пас аз хуруҷи нерӯҳои низомии СААШ аз ин кишвар баҳсу баррасӣ намудаанд.