Бонки «Эсхата» бонки сермизоҷтарин

  Душанбе, 24 декабр. (АМИТ «Ховар», Фарзона Достонзода).- Бино ба хабари маҷаллаи «Банкир» Бонки «Эсхата» дар озмуни дуюми байналмилалии «Бонки сол» — и кишварҳои ИДМ, Балтия ва Гурҷистон сазовори дипломи «Бонки сермизоҷтарин» гардид. Тавре ки аз Бонки «Эсхата» ба АМИТ «Ховар» хабар доданд, ин чорабинӣ воқеаи саривақтию муҳими бахши бонкҳо гардид, зеро маҳз тайи як чанд соли охир ҳаҷми ҳамкории бонкҳои ИДМ, Балтия ва Гурҷистон хеле афзуда, ҳамкории инвеститсионии низомҳои молиявии ин кишварҳо рушд ёфт. Дар маросими мукофотонӣ намояндагони бонкҳои асосии Тоҷикистон, Украина, Русия, Гурҷистон, Озарбойҷон ва Қазоқистон ширкат доштанд. Бонки «Эсхата» — ро сардори раёсати молиявӣ, узви раёсати бонк Исроилов Толибҷон Фозилҷонович намояндагӣ намуд. Мувофиқи 20 номгӯй аз ҷониби ҳайати маҷаллаи «Банкир» диплому мукофотҳои махсус супурда шуданд. То имрӯз Бонки «Эсхата» аз мушорикони хориҷӣ мукофотҳои зиёде гирифтааст, ки ин аз фаъолияти муваффақонаю судманди бонк ва дар арсаи ҷаҳон эътироф шудани он далолат мекунад.