Бунёди роҳ ва пулҳо дар Кангурт

Темурмалик, 14 декабр. (АМИТ Ховар», Сулаймон Холов). — Дар доираи корҳои ободонию созандагӣ дар ҷамоати деҳоти Кангурти ноҳияи Темурмалик сохтмони ду иншооти калон аз ҷониби соҳибкори ватанӣ ҳанӯз аз оғози соли ҷорӣ шуруъ гардида, бо ҷалби сохтмончиёни маҳалӣ беш аз 60 фоизи корҳои сохтмонӣ анҷом ёфтаанд. Бояд зикр намуд, ки ҷамоати деҳоти Кангурт калонтарин ҷамоат буда ва дар 12 деҳаи он беш аз ҳаштуним ҳазор аҳолӣ истиқомат мекунанд. Бунёду ба истифода додани чунин марказҳои хизматрасонӣ ва корхонаҳои хурди саноатӣ метавонад қисми зиёди сокинонро бо ҷои кори доимӣ таъмин намояд. Мушкилоти дигари аҳолии ин ҷамоат набудани роҳ ва пулҳо ба шумор мерафт, ки дар ҳолати сарду серборон омадани зимистону баҳор аз сабаби баланд шудани сатҳи дарёчаи Тоҳир сокинони як қатор деҳаҳо моҳҳо ба маркази ҷамоат ва маркази ноҳия равуо карда наметавонистанд. Бо дастгирии Ҳукумати Ҷумхурии Тоҷикистон дар ин мавзеи ноҳия сохтмони роҳ ва пулҳо идома дорад ва тавассути пулҳои нав сокинони деҳот рафтуомад доранд.