Дар Тоҷикистон беш аз ним миллион тонна ангишт истихроҷ шуд

Душанбе, 19 декабр. (АМИТ «Ховар», Кристина Эрлих).- Тайи 11 моҳи соли равон дар Тоҷикистон беш аз ним миллион тонна ангишт истихроҷ шудааст, ки нисбат ба ҳамин давраи соли гузашта баробари 100 ҳазор тонна зиёд аст. Корхонаҳои бахши истихроҷи ангишт ба манзури иҷрои Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иҷтимоию иқтисодии ҷумҳурӣ барои фаъолияти мунтазаму самарабахш дар давраи тирамоҳу зимистони солҳои 2013 – 2014» истихроҷи ангиштро зиёд менамоянд. Дар ин бора аз Вазорати саноат ва технологияҳои нави ҶТ ба мухбири АМИТ «Ховар» хабар доданд. Мувофиқи суханони манбаъ, тайи 11 моҳи соли равон ҳаҷми фурӯши ангишт 450 ҳазор тоннаро ташкил дод. Захираи ангишт бо назардошти бақияи соли гузашта дар анбору бунгоҳҳои фурӯш баробари беш аз 85 ҳазор тонна мебошад. «Алҳол беш аз 60 корхонаи саноатӣ бо истифода аз ангишт фаъолият дошта, иқтидорҳои нави истеҳсолӣ бо назардошти истифодаи ангишт бунёд мегарданд. Ғайр аз ин дар Тоҷикистон бунёди як қатор корхонаҳои тавлиди маводи сохтмонӣ дар назар аст, ки онҳо бо истифода аз ангишт кор мекунанд», — зикр намуд манбаъ.