Донишҷӯён соҳиби ҷоизаи 500- доллара шуданд

Хоруғ, 18 декабр.(АМИТ «Ховар», Файз Мирасан).-Ду нафар донишҷӯёни Донишгоҳи давлатии шаҳри Хоруғ Фариза Юсупова ва Мунира Султонбекова дар озмуне, ки намояндагии Институти тадқиқоти АвруОсиё дар шаҳри Хоруғ баргузор шуд, ғолиб омада, соҳиби ҷоизаи ба номи Менделеев ва Ломоносов гардиданд. Дар толори хониши Донишгоҳи давлатии шаҳри Хоруғ маросими супоридани ҷоизаи пулии ба номи Ломоносов ва Менделеев доир гардид. Роҳбари намояндагии Институти тадқиқоти АвруОсиё дар вилоят Гулос Раҳматшоев зимни супоридани ин ҷоиза иброз дошт, ки ҳамасола пажуҳишгоҳи тадқиқотӣ дар миёни донишҷӯёни Донишгоҳи давлатии шаҳри Хоруғ озмун баргузор мекунад, ки дар он донишҷӯёни зиёди донишгоҳ ширкат мекунанд. Ғолибони озмун дар давоми мавсими аввали таҳсил 500 доллари амрикоӣ мегиранд. Имсол донишҷӯён Фариза Юсупова –донишҷӯи курси сеюми факултаи филология, бахши забонҳои русӣ соҳиби ҷоизаи пулӣ ба номи Ломоносов ва Мунира Султонбекова-донишҷӯи курси сеюми факултаи химияи ҳамин донишгоҳ соҳиби ҷоизаи ба номи Менделеев гардиданд. Донишҷӯен аз кӯмаку дастгирии намояндагии Институти тадқиқоти АвруОсиё дар шаҳри Хоруғ изҳори хушҳолӣ намуданд ва ваъда доданд, ки минбаъд низ кӯшиш мекунанд бо баҳои хубу аъло таҳсил намуда, барои гирифтани ин ҷоизаҳо талош намоянд. Хотирнишон бояд кард, ки намояндагии Институти АвруОсиё дар шаҳри Хоруғ фаъолияти худро аз соли 2008-ум оғоз намуд.