Хароҷоти МН МО ҶТ барои соли 2014 тасдиқ мегардад

Душанбе, 4 декабр.(АМИТ «Ховар», Марзия Саидова).- Фардо, 5 декабр дар Душанбе ҷаласаи навбатии иҷлосияи панҷуми Маҷлиси намояндагони Маҷлиси Олии Ҷумҳурии Тоҷикистон, даъвати чорум баргузор мегардад. Интизор меравад, ки дар ҷаласа лоиҳаи қонунҳои Ҷумҳурии Тоҷикистон «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2013», „Дар бораи энергетика“, «Дар бораи ворид намудани илова ба Кодекси андози Ҷумҳурии Тоҷикистон», Созишномаи грантӣ байни Ҷумҳурии Тоҷикистон ва Ассотсиатсияи байналмилалии рушд оид ба лоиҳаи «Беҳтаркунии хизматрасонии тиббӣ» баррасӣ мегардад. Ҳамзамон интизор меравад, ки дар назди вакилони палатаи поёнии Парлумони мамлакат Ҳамрохон Расулов- роҳбари дастгоҳи Маҷлиси намояндагон «Оид ба рафти иҷрои сметаи хароҷоти Маҷлиси намояндагони Маҷлиси Олии Ҷумҳурии Тоҷикистон барои соли 2013» гузориш медиҳад. Инчунин дар ҷаласа сохтор, рӯйхати вазифаҳо ва нақшаи хароҷоти Маҷлиси намояндагони Маҷлиси Олии Ҷумҳурии Тоҷикистон барои соли 2014 тасдиқ хоҳад гашт.