Ифтитоҳи шуъбачаи милитсия дар ноҳияи Шоҳмансур

Декабрь 27, 2013 10:23

Душанбе, 27 декабр. (АМИТ «Ховар»).-Вобаста ба супоришҳои роҳбарияти Вазорати корҳои дохилӣ дар сохторҳои милитсия дар шаҳру ноҳияҳо барои боз ҳам хубтар кардани шароити кори нозирони минтақавӣ корҳои назаррас ҷараён дорад.Тавре ки сомонаи расмии ВКД хабар медиҳад, аз ҷумла, 26 декабр дар маҳаллаи «Ховарон»-и ноҳияи Шоҳмансури пойтахт бо иштироки роҳбарияти Вазорати корҳои дохилӣ, сардори РВКД дар шаҳри Душанбе боз як бинои нави маъмурии кормандони милитсия мавриди баҳрабардорӣ қарор гирифт. Бинои нав аз ду ошёна иборат буда, даҳ утоқи кориро дар бар мегирад. Шўъбачаи шаҳрии милитсияи ШВКД дар ноҳияи Шоҳмансур бо беҳтарин шароитҳои замони муосир, фаршҳои гарм, ҳаммом, таҳхона барои бойгонӣ, компютеру воситаи алоқаи босифат таъмин шудааст.Мавриди зикр аст, ки тайи солҳои охир роҳбарияти Ҳукумат барои беҳтар гардидани шароити фаъолияти кормандони мақомоти милитсия таваҷҷуҳи хос зоҳир мекунад.Бунёди сохтмон ва таъмири биноҳои мақомоти корҳои дохилӣ, таъмини воситаҳои нақлиёти хизматӣ дар шаҳру ноҳияҳо далели ин гуфтаҳост. Умед аст, ки муҳайё кардани шароитҳои муосири корӣ аз кормандони милитсия дарки баланди масъулият, садоқат ба касб ва хизмати шабонарўзиро тақозо мекунад.

Декабрь 27, 2013 10:23

Хабарҳои дигари ин бахш