Истифодаи самараноки технологияи итилоотӣ

Хоруғ, 28 декабр. (АМИТ «Ховар», Файз Мирасан).-Чанд сол қабл хонандагони мактаби таҳсилоти умумии деҳаи Ҷовидони ҷамоати Ҷовидони ноҳияи Ванҷ дар фасли зимистон ба иллати норасоии нерӯи барқ наметавонистанд аз технологияи информатсионӣ истифода баранд. Аммо бо бунёди нерӯгоҳи хурди барқӣ бо иқтидори 800 киловатт дар маркази ноҳия акнун ин фанни муҳим бидуни таъхир баргузор мегардад. Бинои мактаби мазкур cе сол қабл бо ширкати Сарвари давлат мавриди баҳрабардорӣ қарор гирифт ва комилан аз асбобҳои таълимию аёнӣ ва таҷҳизоти информатсионӣ таъмин карда шуд. Аз ҳама муҳим ин ки хонандагон дар тамоми мавсими таҳсил ҳам дар фасли тирамоҳу ҳам зимистон ба компютер дастрасӣ доранд ва ин фанни таълимӣ мувофиқи нақша баргузор мегардад. Ба ақидаи Рамазон Шумқоров сарфи назар аз он ки хонандагон дар оянда кадом касбро интихоб накунанд, ҳатман бо технологияи информатсионӣ рӯ ба рӯ хоҳанд гашт. Дар назар аст, ки дар ояндаи наздик дар мавзеи Ванҷи боло боз як неругоҳи хурди барқӣ бунёд гардад ва имконияти гарм кардани синфхонаҳои мактаб ба василаи неруи барқ пайдо хоҳад шуд. Дар соли равон мактаби мазкурро 27 хонанда хатм намуд, ки 14 нафари онҳо ба донишгоҳҳои олии кишвар ва берун аз он дохил гардиданд.