Муҳаббат ва Анвар ба Булғористон мераванд

Хоруғ, 24 декабр.(АМИТ «Ховар», Файз Мирасан).-Ду нафар варзишгар аз Шуғнон дар мусобиқаи ҷумҳуриявӣ аз намуди киёкушинкай мақоми аввалро ишғол намуда, ба мусобиқаи ҷаҳонӣ, ки охири моҳи декабр дар кишвари Булғористон баргузор мегардад, роҳхат гирифтанд. Муҳаббат Чоршанбеева дар миёни духтарон ва Анвар Лангарчиев дар байни писарон соҳиби медали тилло гардиданд. Ин варзишгарон чанд сол боз таҳти роҳбарии мураббияшон Шаҳаншоҳ Муносибшоев ба тамрини киёкушинкай машғуланд ва сол аз сол маҳорату малакаашонро такмил дода, пайваста дар мусобиқаҳои ҷумҳуриявӣ ширкат мекунанд. Муҳаббат Чоршанбеева, ки ба машқи ин намуди варзиш аз овони кӯдакӣ машғул аст, гуфт, ки ҳарчанд тамрини намуди мазкур дар байни духтарону занони тоҷик чандон роиҷ нест, аммо вай кӯшиш мекунад аз ҳисоби духтарони маҳаллӣ теъдоди тими духтаронаро афзоиш диҳад. Муҳаббат мақсад дорад, дар сабқати ҷаҳонӣ ҳарифони худро шикаст дода, парчами кишвари худро боло барад. Ба гуфтаи мураббии тими мазкур Шаҳаншоҳ Муносибшоев раиси вилоят ҳангоми суҳбат гуфтааст, ки хароҷоти сафари ин варзишгаронро ба сабқати хориҷ аз кишвар таъмин мекунад.