Муҳокимаи чорабиниҳои нав алайҳи маводи мухаддир

Душанбе, 2 декабр. (АМИТ «Ховар», Лутфия Эшонқулова).- Дар шаҳри Душанбе конфронс бахшида ба ҳамкории Афғонистону Тоҷикистон дар бахши назорати маводи мухаддир ба кораш шурӯъ намуд. Роҳбарони мақомоти зидди маводи мухаддири Афғонистону Тоҷикистон, кӯҳансолони қабилаҳои ҷамоаҳои наздисарҳадӣ, ҳамчунин олимон ва кормандони амният барои муҳокимаи чорабиниҳои нав ҷиҳати ҳамкории байни Афғонистону Тоҷикистон алайҳи гардиши ғайриқонунии маводи нашъаовар ва баррасии тадбирҳои дуҷониба барои муқобилат ба хавфу хатари маводи мухаддири Афғонистон дар пойтахти Тоҷикистон ҷамъ омаданд. Конфронс, ки бо ибтикори Раёсати СММ оид ба маводи мухаддир ва ҷинояткорӣ дар ҳошияи барномаи минтақавӣ оид ба Афғонистон ва кишварҳои ҳамсоя роҳандозӣ шудааст, се рӯз давом мекунад.Дар конфронс ибтикороти нав ба манзури амнияти сарҳадот ва ҳамкории кишварҳои сарҳадӣ барои муқобилат ба интиқоли маводи мухаддир ба Тоҷикистон ва муносибатҳои иқтисодӣ ба низоми таъмини ҳаёти осоиштаи ҷамоаҳои наздисарҳадӣ ба назари эътибор гирифта мешаванд.