Муаррифии саҳифаи нави вебсайти гендерӣ дар Агентии омор

Душанбе, 14 декабр. (АМИТ «Ховар», Лутфия Эшонқулова).- Дар Агентии омори назди Президенти Ҷумҳурии Тоҷикистон оид ба масъалаҳои муҳими тақвият бахшидани фаъолият дар соҳаи омори гендерӣ мизи мудаввар гузаронида шуд. Дар мизи мудаввар муаррифии саҳифаи нави вебсайти гендерӣ гузаронида шуда, ҳамчунин «Барномаи рушди омори гендерӣ дар Ҷумҳурии Тоҷикистон барои давраи солҳои 2014-2015» пешниҳод карда шуд.Чорабинӣ дар чорчӯбаи татбиқи барномаи минтақавии Бонки Осиёи Рушд «Мусоидати гендерию инклюзивии рушд дар мамлакатҳои рӯ ба тараққӣ, иштирокдорони Осиёи Марказӣ ва Ғарбӣ/Рушди иқтидори Агентии омори назди Президенти Ҷумҳурии Тоҷикистон дар соҳаи омори гендерӣ» бо кӯмаку дастгирии молиявии Бонки Осиёи Рушд ба андозаи 22,7 ҳазор доллари ИМА ташкил шудааст. Иҷрокунандаи лоиҳаи мазкур созмони ҷамъиятии ҷумҳуриявии «Хазинаи паст кардани сатҳи камбизоатӣ» мебошад. Зикр кардан зарур аст, ки ин гуна ташаббусҳо дар Ҷумҳуриҳои Қазоқистон, Қирғизистон дар доираи барномаи мазкури Бонки Осиёи Рушд бо муваффақият татбиқ шуда буданд.Дар ин бора ба АМИТ «Ховар» аз маркази матбуоти Агентии омори назди Президенти Ҷумҳурии Тоҷикистон хабар доданд.